中環Blog Blog齋

一篇“李家之城?”竟然成為禍首，慘被”勸退”…..

從至，司馬十一不會再寫財經雜文…只是，原來傳媒真的有自我審查!!!

相信這份報紙銷量實在有限，此Blog不過只得萬零pageview，筆下的”李家之城?”，早加了個問號，懂中文的該明白其意!行文亦不過只是質疑，但就惹來封殺。

相信李超人，小超人甚至蕃薯梁一眾大孖沙未必有空閒閱讀本文，看了也會一笑置之!

估計係汝等身邊之擦鞋仔心急護主，眼下難容一粒沙石，才狗急智生，於是手起刀落封殺了司馬…

於是，司馬死了，不能再寫財經雜文…..

原來，香港媒體也死了!

電盈(008)股權發展到依家終於揭盅，根據番薯梁收購電盈財團名單中，有李超人以私人基金入股電盈12%，西班牙電訊Telefonica入股8%，網通亦將其2%股份為Telefonica所持股份組合營公司再注入電盈，相信網通會成為電盈之單一最大股東。

終於開故之後，大家都明白番薯梁只係「職業經理人」，而網通曾經表示過不欲電盈落入外國人手中，而婉拒新橋及麥格理之洽購。似乎與現時之財團名單有點衝突矣！不過令小股東擔心係，李超人旗下有固網又有流動電話，除減低行業競爭之外，更有口痕友話香港遲早變「李家之城」。可能到時會同另一間關連電訊公司聯手，發動固網、寬頻等大規模減價戰，迫走其他對手，到時電訊業便好像經史學名句一樣：「合久必分、分久必合」了。

上周港股因匯豐銀行宣布調低最優惠利率，令大市再上層樓，但係地產股只係急升一兩日就散番晒，當然有恒隆(101)配股亦令投資者擔心其他地產股效法，令地產股炒唔起。

地產商缺土儲

其實地產市道麻麻，地產商缺乏儲備土地，想勾地政府唔係咁容易批，凡此種種都令地產股落後於大市主因，睇埋股價更加係令人失望。

好似長實(001)，上個禮拜收報88.95元，距2000年歷史高位123元仲好遠。

事實上，地產股其實並無在近期股市大升浪中受惠，唔少股份仲係維持今年5月份之水平。各位如有貨在手，真係要獲利為上呀！

大市只係回吐一日，尋日又再度反撲，當然主力部隊中移動(941)同匯控(005)就繼續上升，但係中資股就終於吐氣揚眉，令國企指數大升164點，收報7911點，真係跑贏大市呀！

中資金融股及保險股齊齊造好，工行(1388)、建行(939)造好唔出奇，中國人壽(2628)被傳向中證監遞交A股上市申請，全日升0.36，收報17.2元，被人忽視中財險(2328)被大行唱好，尋日勁升8.5%，收報3.06元。

嘉利盈購港殯儀業務 嘉利盈(8029)落實收購香港殯儀業務，並商討收購內地殯儀服務現在骨灰位的價格急升，供不應求的狀態，估計有概念可帶動佢的股價中長線看好。噚日復牌，不過股價表現反覆，先升後跌，收報0.62元。不過話時話，人去左都無個安全位抖下，真係唏噓！

大市果然開始反覆，早段高見18995點後，就開始呈現沽壓，11點前開始急跌，午後跌幅擴大，曾經跌至18750點，最後收報18811點跌128點，成交仍然有490億元。

利淡情緒蓋股市

市場氣氛開始有利淡情緒，雖未至於人心虛怯，但係獲利沽貨係人心所向，中移動(941)由高位67元，跌至收市65.2元，跌1.85元，匯控(005)亦微跌0.3元，收報150.9元。地產股個別發展，似乎後勁乏力。

大戶托住中移動

藍籌成交佔大市四成，不過要扣除恒隆(101)之配股上板，市場傳聞話大戶托住沽中移動，係有秩序疏散喎！中移動有兩支大陰觸，短線推翻身乏術，若相信大市未死的讀者，不如選擇落後國企股吧！

正所謂花無百日紅，股市同樣係咁情況，港股牛氣沖天，仲加埋獅子銀行帶頭減息，地產股齊齊反彈，港股又沖到上去見19161點。不過萬九點始終係心理關口，三點半後，大戶突然發難，齊齊骨水獲利，尤其係中移動(941)由高位69.7元，插返落67.05元收市，跌1.7元，最多其實跌2.5元之多。

雖然港股單日轉向，而且打回原形，連萬九點都失守。但係噚日全日成交金額就有517億元。相信熱錢仍然在港，只係換馬，所以中移動雖跌，但仲有匯控(005)接力升0.8元，收報151.2元。

本周港股隨時會有大調整，真係會挾完淡倉挾好倉，先殺班窩輪散戶。

另外，資金會隨處走，相信沉寂多時的金屬股，將現一場大風浪！

雖然外圍股市真係一般，但港股就「千山我獨行，不必相送」，午後大戶仍然係集中精力舞高中移動(941)，再度令恒指高見18941點歷史高位，坊間更盛傳年底向20000點進軍。

收市後匯豐首先宣布調低最優惠利率，減25點子，由8%調低至7.75%，東亞銀行宣布跟隨。匯豐突然減息令市場嘩然，其震撼力不下於噚日恒指直逼萬九點。

減息最利地產股反撲，因為地產股其實未升過，相信今日仲唔搵到藉口衝番轉咩！另外，今晚美國中期選舉將有結果，淡友以為若共和黨落敗，杜指將借勢下跌，不過此壞消息會否已在上周連跌六天盡反映呢？技術上杜指已超賣，反彈力度將非同小可，讀者唔做好友都不要做淡友了！